100 ildən çox tarixi olan Azərbaycan karikatura sənətini yaşatmaq, inkişaf etdirmək və beynəlxalq aləmdə tanıtmaq məqsədi ilə ölkəmizdə ilk dəfə olaraq «Molla Nəsrəddin. Azərbaycan- 2008» Beynəlxalq Karikatura Müsabiqəsi elan etdik. Azərbaycan Respublikası Mədəniyyət və Turizm Nazirliyinin , Beynəlxalq Karikaturaçılar Təşkilatları Federasiyasının, Azərbaycan Rəssamlar İttifaqının təşkilatçılığı və dəstəyi ilə keçirilən bu beynəlxalq müsabiqəyə 50 ölkədən 500 rəssam 1000-ə yaxın əsəri ilə qatılmışdır. Müsabiqənin obyektivliyinə və şəffaflığına zəmanət verən, müxtəlif ölkələrdən dəvət olunmuş beynəlxalq münsiflər heyəti iştirakçıların əsərlərini qiymətləndirərək qalibləri və mükafatçıları təyin etmişlər. Sevindirici haldır ki, azərbaycanlı karikaturaçılar, xüsusi ilə də gənc rəssamlar bu müsabiqədə fəal iştirak edərək ölkəmizi layiqincə təmsil etmişlər.
Biz qalibləri təbrik edir, yaradıcılıq uğurları arzulayır və bütün iştirakçıları qarşıdan gələn «Molla Nəsrəddin. Azərbaycan - 2009» Beynəlxalq Karikatura Müsabiqəsinə dəvət edirik.
Bayram Hacızadə
Azərbaycan Karikaturaçı Rəssamlar Birliyinin sədri,
Müsabiqənin münsiflər heyətinin sədri
