Azərbaycanda müxtəlif təşkilatlarda çalışan bu istedadlı rəssamlar 2000-ci ildə «Azərbaycan Karikaturası», «Karikatura evi», daha sonra «Karikaturaçılar Birliyi» və ya hər hansı bir jurnalın nəzdində ayrı-ayrılıqda fəaliyyət göstərirdilər. Və nəhayət, 2006-cı ildə «Azərbaycan Karikaturaçı Rəssamlar Birliyi»-nin yaradılması ilə bu pərakəndəliyə son qoyuldu. Müxtəlif birlik və ittifaqların üzvləri olan, müxtəlif düşüncəli və əqidəli insanları bir araya gətirən qüvvə karikaturaya sevgidən irəli gəlirdi. Bu rəssamların içində ömürlərinin 20-30 ilini bu sahəyə həsr edən insanlarla yanaşı, gənc karikaturaçılar, tələbələr və bu sahədə ilk addımlarını atan rəssamlar da vardır. İlk günlər əsasən, 30-a yaxın üzvü olan Azərbaycan Karikaturaçı Rəssamlar Birliyinin qısa müddət ərzində üzvlərinin sayı artaraq 70 nəfərə yaxın olub. Cəmi bir il fəaliyyət göstərən Birliyin qarşısına qoyduğu məqsədlərdən birincisi gənclərin bu sahəyə marağını artırmaqdır. Gələcəkdə Azərbaycanı intellektual səviyyədən güclü, rəssamlıq baxımından peşəkar karikaturaçılarla təmin etməkdir. Məhz bu məqsəd ilə bir sıra tədbirlər əyata keçirilib.
